ထိုင်း-မြန်မာနယ်စပ်ရှိ မယ်လဒုက္ခသည်စခန်းတွင် ရက်သတ္တ နှစ်ပတ်ခန့်အတွင်း ကာလ၀မ်းရောဂါဖြစ်ပွားသူ (၅၃) ဦး ရှိပြီဖြစ်သဖြင့် စိုးရိမ်စရာဖြစ်သည်ဟု စခန်းဆေးရုံတာဝန်ခံ ဆရာစောနေဆဲက ပြောကြားသည်။၎င်းက “အရင်လ (၂၇) ရက်ကစပြီး ဒီနေ့အထိ ကာလ၀မ်းရောဂါဖြစ်သူ (၅၃) ဦးရှိသွားပြီ။ ရေကြောင့် အဓိကဖြစ်တာပဲ၊ စခန်းမှာသုံးတဲ့ ရေကမသန့်ဘူး၊ လျှော်ဖွတ်တာလည်း ဒီရေပဲ၊ သောက်သုံးတာလည်း ဒီရေပဲ။ နောက်တချက်က အစားအစာပဲ။ အမှဲ့လွန်တဲ့ သစ်သီးတွေနဲ့ မသန့်တဲ့ ဟင်းသီးဟင်းရွက်တွေကြောင့် ဒီကူးစက်ရောဂါဖြစ်ရတာပါ။ အခုဖြစ်နှုန်းအရဆိုရင် စိုးရိမ်စရာအဆင့်မှာ ရှိနေပါတယ်” ဟု ပြောသည်။
ရောဂါဖြစ်ပွားနေသူများကို စခန်းအတွင်းရှိ ကာလ၀မ်းရောဂါ ကုသရေးဌာနတွင် ကြပ်မတ်ကုသပေးလျက်ရှိပြီး စိုးရိမ်ဖွယ်ရာလူနာ (၅) ဦးမှလွဲ၍ သေဆုံးသူများ မရှိသေးကြောင်း၊ သက်ဆိုင်ရာ ကျန်းမာရေးဌာနများနှင့် ချိတ်ဆက်၍ လုပ်ဆောင်နေကြောင်း စောနေဆဲက ပြောသည်။
ရောဂါထိန်းချုပ်မှုအတွက် သင့်တော်သလိုသာ လုပ်ဆောင်နေရပြီး စခန်းတခုလုံး မပြန့်ပွားရေးအတွက် အထူးကြပ်မတ် လုပ်ဆောင်ရန် လိုအပ်သည်ဟု ၎င်းကပြောသည်။
“အခုရောဂါဖြစ် ပွားနေတဲ့လူတွေက ရပ်ကွက် (၃) ခုက လူတွေပဲ ရှိသေးတယ်၊ အခြားရပ်ကွက်တွေ မပါသေးဘူး။ အခြားရပ်ကွက်တွေပါ ဖြစ်မယ်ဆိုရင် ကျနော်တို့ဆေးရုံမှာ ဘယ်လိုမှ နိုင်မှာမဟုတ်ဘူး၊ မယ်လစခန်းမှာ အဓိကပြဿနာက ရေပဲ။ ရေမလုံလောက်တော့ လူတွေက ကိုယ့်နည်းကိုယ့်ဟန်နဲ့ ရေတွင်းတွေကို ဖြစ်သလိုတူးပြီး သုံးစွဲကြတော့ တကယ်အန္တရာယ်များပါတယ်။ အဲဒီရေတွင်းတွေကို စစ်ဆေးကြည့်တော့ ကာလ၀မ်းရောဂါပိုးတွေ တွေ့ရတယ်” ဟု စောနေဆဲက ရှင်းပြသည်။
မယ်လဒုက္ခသည်စခန်းတွင် ရပ်ကွက် (၂၂) ခုရှိသည့်အနက် ရပ်ကွက် (၃) ခုတွင် ၀မ်းရောဂါ ဖြစ်ပွားနေသည့်အတွက် ကျန်ရပ်ကွက်များသို့ ကူးစက်မှုမဖြစ်ရန် ရောဂါကာကွယ်ရေးလုပ်ငန်းများနှင့် ပညာပေးလုပ်ငန်းများ ဆောင်ရွက်နေသည်ဟု စခန်းဥက္ကဋ္ဌ မန်းထွန်းထွန်းက ပြောသည်။
၎င်းက “ကူးစက်မှုအများဆုံးဖြစ်တဲ့ စီဝမ်းဘီ၊ စီသရီးအေနဲ့ စီသရီးဘီ ရပ်ကွက် (၃) ခုမှာရှိတဲ့ လက်လုပ်ရေတွင်းတွေကို ပိုးသတ်ဆေးတွေဖြန်းပြီးပိတ်ထားတယ်။ စခန်းတခုလုံးမှာလည်း ပညာပေးမှုနဲ့ စည်းကမ်းချက်တွေ ထုတ်ထားတယ်၊ ရောဂါကူးစက်မယ့် အစားအစာ ရောင်းချခွင့်တွေကိုလည်း ပိတ်ထားတယ်” ဟု ပြောသည်။
မယ်လဒုက္ခသည်စခန်းတည်ရှိရာ ထာ့ဆောင်ရန်းမြို့နယ်၏ ထိုင်းကျန်းမာရေးအရာရှိတဦးက စခန်းအတွင်း ကူးစက်ရောဂါများ အလျင်အမြန်ဖြစ်ပွားရခြင်းမှာ ရေနှင့်မိလ္လာစနစ်မရှိဘဲ လူဦးရေထူထပ်စွာ နေထိုင်ရခြင်းကြောင့် ဖြစ်သည်ဟု ဆိုသည်။
ဒုက္ခသည်တဦးဖြစ်သူ စောကညောက “ဒီလို ကူးစက်ဝမ်းရောဂါဖြစ်တာ စခန်းထဲမှာ ရေမလုံလောက်တော့ ကိုယ့်အိမ်နားမှာပဲ ရေတွင်းတူးကြတယ်။ အိမ်သာနဲ့ရေတွင်းက နီးနီးကပ်ကပ်ဆိုတော့ အန္တရာယ်ရှိတယ်။ နောက်ပြီး ထိုင်းဈေးကွက်မှာ ရောင်းလို့မကုန်တဲ့ သစ်သီးဝလံမျိုးစုံနဲ့ ဟင်းသီးဟင်းရွက်တွေကို ဈေးပေါပေါနဲ့ ကားအစီးလိုက် စခန်းထဲကဈေးမှာ လာရောင်းတာကို စခန်းတာဝန်ရှိသူတွေက ရောင်းခွင့်ပေးတယ်။ ဒီပြဿနာတွေကို တာဝန်ရှိသူတွေ အသေအချာ ကိုင်တွယ်ဖြေရှင်းပေးဖို့ လိုတယ်” ဟု ပြောသည်။
မယ်လဒုက္ခသည်စခန်းဆေးရုံကို ပြင်သစ်အခြေစိုက် နိုင်ငံတကာ ဆေးဘက်ဆိုင်ရာ အဖွဲ့စည်းတခုဖြစ်သည့် Aide Medical International (AMI) အဖွဲ့နှင့် ပူးတွဲဖွင့်လှစ် လုပ်ဆောင်နေခြင်းဖြစ်သည်။
ထိုစခန်းသည် ထိုင်း-မြန်မာနယ်စပ် မဲဆောက်မြို့တောင်ဘက် (၆၅) ကီလိုမီတာအကွာတွင် တည်ရှိပြီး ဒုက္ခသည်(၅) သောင်းခန့် နေထိုင်လျက်ရှိသည်။
0 comments:
Post a Comment