NEJ / ၁၉ ဇွန် ၂၀၁၀
ယနေ့ ဇွန် (၁၉) ရက်တွင် ကျရောက်သည့် ဒေါ်အောင်ဆန်းစုကြည်၏ (၆၅) နှစ်မြောက် မွေးနေ့တွင် ကုလသမဂ္ဂ အတွင်းရေးမှူးချုပ် ဘန်ကီမွန်းနှင့် အမေရိကန်သမ္မတ အိုဘားမားတို့က ဒေါ်အောင်ဆန်းစုကြည်အား လွှတ်ပေးရန် စစ်အစိုးရခေါင်းဆောင်များအား ထပ်လောင်းတောင်းဆိုလိုက်သည်။
မစ္စတာဘန်ကီမွန်းက သောကြာနေ့တွင် ပြုလုပ်သည့် သတင်းစာရှင်းလင်းပွဲ၌ ဒေါ်အောင်ဆန်းစုကြည်၏ မွေးနေ့အတွက် ဆုမွန်တောင်းရင်း သူ့အနေဖြင့် ဒေါ်အောင်ဆန်းစုကြည် နေအိမ်အကျယ်ချုပ် ကျခံနေရဆဲဖြစ်သည့်အတွက် “အလွန်စိုးရိမ်ပူပန်” ဖြစ်မိကြောင်း၊ ဒေါ်အောင်ဆန်းစုကြည်နှင့် နိုင်ငံရေးအကျဉ်းသားအားလုံးကို ယခုနှစ်ကျင်းပမည့် ရွေးကောက်ပွဲတွင် ပါဝင်နိုင်စေရန် အမြန်ဆုံးလွှတ်ပေးသင့်ကြောင်း ပြောကြားလိုက်သည်။
မစ္စတာဘန်ကီမွန်းက “ဒေါ်အောင်ဆန်းစုကြည်ကို လွှတ်မပေးဘဲ နေအိမ်အကျယ်ချုပ်နဲ့ ထိန်းသိမ်းထားဆဲဖြစ်လို့ ကျနော် သိပ်ကို စိုးရိမ်မကင်းဖြစ်ရပါတယ်။ ဒေါ်အောင်ဆန်းစုကြည်အပါအ၀င် နိုင်ငံရေးအကျဉ်းသားတွေ အားလုံးကို ခြွင်းချက်မရှိ အမြန်ဆုံး လွှတ်ပေးသင့်တယ်လို့ ကျနော် တစိုက်မတ်မတ် တောင်းဆိုခဲ့ပါတယ်။ ဒီလိုလွှတ်ပေးမှသာ သူတို့အနေနဲ့ ဒီနှစ်အတွင်း မြန်မာအစိုးရလုပ်မယ့် ရွေးကောက်ပွဲက နိုင်ငံရေးလုပ်ငန်းစဉ်တွေမှာ ပါဝင်နိုင်မှာ ဖြစ်ပါတယ်” ဟုပြောသည်။
ထို့အပြင် “ဒီရွေးကောက်ပွဲမှာ သက်ဆိုင်သူတွေအားလုံး ပါဝင်သင့်ပါတယ်။ နိုင်ငံရေးပါတီတွေအားလုံးနဲ့ ပြည်သူလူထုတရပ်လုံး ပါဝင်နိုင်မှသာ အများလက်ခံယုံကြည်ပြီး မှန်ကန်တဲ့ ရွေးကောက်ပွဲအဖြစ် အများက အသိအမှတ်ပြု လက်ခံနိုင်ကြမှာ ဖြစ်ပါတယ်” ဟု ပြောသည်။
အမေရိကန်သမ္မတ မစ္စတာအိုဘားမားကလည်း ဒေါ်အောင်ဆန်းစုကြည့်၏ (၆၅) နှစ်မြောက် မွေးနေ့တွင် ဆုမွန်ကောင်း တောင်းဆိုလိုက်သည့်အကြောင်း သောကြာနေ့က ကြေညာချက်တစောင် ထုတ်ပြန်လိုက်သည်။
ထိုကြေညာချက်တွင် မြန်မာနိုင်ငံ၌ လူ့အခွင့်အရေးနှင့် ဒီမိုကရေစီရေး ပြုပြင်ပြောင်းလဲမှုများအတွက် ဒေါ်အောင်ဆန်းစုကြည်၏ စိတ်ဓာတ်ခိုင်မာပြတ်သားမှု၊ သတ္တိရှိမှု၊ ကိုယ်ကျိုးစွန့် အနစ်နာခံမှုများကို သမ္မတ အိုဘားမားက ထုတ်ဖော်ချီးကျူးထားသည်။ ထို့အပြင် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားအားလုံးအား ခြွင်းချက်မရှိ ချက်ချင်းလွှတ်ပေးရန်လည်း ထပ်မံတောင်းဆိုလိုက်သည်။
မစ္စတာအိုဘားမားက “ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားတွေ အားလုံးကို ခြွင်းချက်မရှိ ချက်ချင်းလွှတ်ပေးဖို့ ကျနော့်အနေနဲ့ မြန်မာအစိုးရကို နောက်တကြိမ် ထပ်မံတောင်းဆိုပါတယ်။ သူတို့အားလုံးကို မြန်မာပြည်သူအားလုံးရဲ့ လူ့အခွင့်အရေးကို လေးစားတဲ့၊ ကြီးပွားတိုးတက်တဲ့၊ တည်ငြိမ်အေးချမ်းတဲ့ မြန်မာနိုင်ငံထူထောင်ရေးမှာ ပါဝင်ခွင့်ပေးဖို့လည်း တောင်းဆိုပါတယ်” ဟု ပြောကြားသည်။
ဒေါ်အောင်ဆန်းစုကြည်သည် နှစ်ပေါင်း (၂၀) ကျော်အတွင်း နေအိမ်အကျယ်ချုပ် အကြိမ်ကြိမ်ကျခံနေရသည်မှာ (၁၅) နှစ်နီးပါး ရှိပြီဖြစ်သည်။
Subscribe to:
Post Comments (Atom)
0 comments:
Post a Comment